Featured News
സംസ്കൃത സര്വ്വകലാശാലയുടെ തിരുവനന്തപുരം പ്രാദേശിക ക്യാമ്പസിൽ നാല് വര്ഷ ബിരുദ പ്രവേശനം
Published: June 10, 2026
Updated: June 10, 2026
1 min read
സംസ്കൃത സര്വ്വകലാശാലയുടെ തിരുവനന്തപുരം പ്രാദേശിക ക്യാമ്പസിൽ
നാല് വര്ഷ ബിരുദ പ്രവേശനം; അവസാന തീയതി ജൂണ് 15
ശ്രീശങ്കരാചാര്യ സംസ്കൃത സര്വ്വകലാശാലയുടെ തിരുവനന്തപുരം പ്രാദേശിക ക്യാമ്പസിൽ 2026 – 2027 അദ്ധ്യയന വർഷം ആരംഭിക്കുന്ന വിവിധ നാല് വര്ഷ ബിരുദ പ്രോഗ്രാമുകളിലേയ്ക്ക് ഓണ്ലൈനായി അപേക്ഷ ക്ഷണിച്ചു. സംസ്കൃതം - വേദാന്തം, സംസ്കൃതം -ന്യായം, ഫിലോസഫി എന്നിവയാണ് നാല് വര്ഷ ബിരുദ സമ്പ്രദായത്തിൽ നടത്തപ്പെടുന്ന ബിരുദ പ്രോഗ്രാമുകളൾ. സംസ്കൃത വിഷയങ്ങളിൽ ബിരുദ പഠനത്തിന് (മേജർ) പ്രവേശനം നേടുന്ന മുഴുവന് വിദ്യാര്ത്ഥികള്ക്കും പ്രതിമാസം 500/- രൂപ വീതം സര്വ്വകലാശാല സ്കോളര്ഷിപ്പ് നല്കുന്നതാണ്. നാല് വര്ഷ ബിരുദ പ്രോഗ്രാമുകളുടെ പ്രവേശനത്തിനുളള ഉയർന്ന പ്രായപരിധി ജനറല് / എസ് ഇ ബി സി വിദ്യാര്ത്ഥികള്ക്ക് 2026 ജനുവരി ഒന്നിന് 23 വയസും എസ് സി / എസ് ടി വിദ്യാര്ത്ഥികള്ക്ക് 25 വയസുമാണ് .
പ്ലസ് ടു/വൊക്കേഷണല് ഹയർ സെക്കന്ററി അഥവ തത്തുല്യ അംഗീകൃത യോഗ്യതയുളളവര്ക്ക് ഈ പ്രോഗ്രാമുകളിലേയ്ക്ക് അപേക്ഷിക്കാവുന്നതാണ്. നാല് വര്ഷ ബിരുദ പ്രോഗ്രാമുകള്ക്ക് ലാറ്ററല് എന്ട്രി അനുവദനീയമാണ്. ഒരു വിദ്യാർത്ഥിക്ക് ഒന്നിലധികം ബിരുദ പ്രോഗ്രാമുകളിലേയ്ക്ക് അപേക്ഷിക്കുവാൻ കഴിയും. മറ്റൊരു യു ജി പ്രോഗ്രാം വിജയകരമായി പൂര്ത്തിയാക്കിയിട്ടുളളവര്ക്കും സർവകലാശാല നിശ്ചയിച്ചിട്ടുള്ള മാനദണ്ഡങ്ങളുടെ അടിസ്ഥാനത്തിൽ നാല് വര്ഷ ബിരുദ പ്രോഗ്രാമുകളിലേക്ക് സര്വകലാശാലയുടെ അംഗീകാരത്തോടെ അപേക്ഷിക്കാവുന്നതാണ്. അപേക്ഷ ഫീസ് ജനറല് / എസ് ഇ ബി സി വിദ്യാര്ത്ഥികള്ക്ക് ഓരോ പ്രോഗ്രാമിനും 60 രൂപയും എസ് സി / എസ് ടി വിദ്യാര്ത്ഥികള്ക്ക് ഓരോ പ്രോഗ്രാമിനും 30 രൂപയുമാണ്. അപേക്ഷകള് ഓൺലൈനായി സമര്പ്പിക്കേണ്ട അവസാന തീയതി ജൂണ് 15. കൂടുതല് വിവരങ്ങള്ക്ക് www.ssus.ac.in സന്ദര്ശിക്കുക.